اليوم دار بيني وبين هيئة سوق المال حوار خيالي ولا طلعت منهم بنتيجه رغم اني كاشخ ومنكس العقال وحاط البشت على ذراعي ... المهم
ماعليكم من كشختي تبون الزبده وش قلنا ووش قالوا ... طيب اسمعوا ( وشلون اسمعوا وانتم تقرون ) :
# السلام عليكم ياهيئة
$ وعليكم السلام نعم وش تبي
# عندنا شركة وقدمنا طلب زيادة راس المال من حوالى سنه والى اليوم ماصدر لنا شي
$ عندنا اوراقك بس مابعد بتينا فيها
# وليش مابتيتوا فيها الله يسلمك ؟
$ مازالت تحت الدراسة.. وبعدين عندنا عدة شركات كلها بنفس الطلب وماوافقنا لاحد وعليك الانتظار الين يجيك الدور
# طيب اخوي له شركة وقدم اوراقها عشان تطرح للاكتتاب ولا طرحتوها الى يومك
$ هم بعد اخوك يمسك سرا وينتظر دوره الين نخلص من دراستها
# لكن ابطيتوا علينا وملينا من الانتظار
$ الله يهديك ترى غيرك واجد وماجوا يشتكون .. كن ماعندنا الا انت واخوك
# وسع صدرك ولا تزعل تدري ويش يقولون المحللين الاقتصاديين عن اسهم الشركات السعودية
$ ها ويش يقولون ؟
# يقولون الله يسلمك ان الاسهم متضخمه سعرياً وان السبب كثرة السيوله بيدين الناس
$ اثرك عفريت وتعرف ها العلوم ... بس ما قالوا لك ويش الحل لها المشكله ؟
# الا طال عمرك قالوا ان اسلم الطرق لسحب هذه السيوله يتمثل في طرح شركات جديده والموافقة على زيادة راس مال بعض الشركات
$ كلامهم صحيح ولكن حنا مانبي نتعب الناس وننزل الشركات وزيادة راس المال دفعه وحده يمكن بعضهم ماعنده سيوله كافيه
# يعني مانتم منزلين شي ؟
$ الا طال عمرك نبي ننزل بس بالتقسيط المريح يعني كل شهر شركة اكتتاب وشركة زيادة راس مال مثل ماسوينا هالشهر وافقنا لشركة
اميانتيت بزيادة راس المال وعقبها نزلنا اكتتاب شركة المراعي وعلى كذا كل شهر لك مني ثنتين وحده زياده ووحده اكتتاب
# ياوجه الله !! اجل متى بتنزل شركتي وشركة اخوي نبي ناخذ سنتين وحنا ماوصلنا السرا
$ اها اها ... ردينا على يطير يلي قلنا لك متى مانتهينا من الدرسه بتينا فيها والله يعينك على الصبر انتهينا
طبعاً كان عندي اموركثيره ودي اناقشها مع الهيئه بس ماعطوني فرصه ولى رده ان عاش راسي ....
هذا الحوار للمداعبه من اخيكم (( قناص999 )) فهل ترون انه يحاكي واقعـنا الحالي ؟؟
28-07-2005, 12:00 AM
هيئة سوق المال وزيادة راس المال واكتتاب الشركات الجديده 
العرض العادي
