بلاد الحلم

جاني واحد قال : بسأل كم سؤال
وقبل يسأل قلت : أنا ماني خبير !
قال: جاوب بس , يا ولد الحلال
وكل كلمه حِطَّهَا .. بشطرٍ صغير
قال نبدي : شنهو تعريف المُحال..؟
قلت :
خَل هالكلمه فـ البيت الأخيـر ..!

القهر : إن شفت دمعـات الرجال
و الوطن : ( إنسان ) .. مِتغيِّر كثير

و الطفل : لعبه على شاطـي الرمال
و الأمل : إحساس في عين الضرير

الوفا : [ قلبين ] .. يجمَعهُم حلال
و الرَجُل : اللـي علـى أهلـه يغير

و الرجا : لا قلت : للواطـي تعال
و الفشل : مدري .. ولكنـه مرير

و الشعر : في وقتنا .. بدر و طلال
زين أوَّل : حيـل يعجبنـي جرير ..!

و الغلا : إحساس إلى حَـد الخيال
و العِشِق : لا شفت مَعشُوقِك تطير

و الجفا : إعكس مفاهيم / الوصال
و الوَصِل : يعني تأكَّد .. فيك خير

و العقل : تِسْفَه أقاويل , الجهال
و الجهل : إن قلت عن نفسك كبير

و الخطر : لا صار ما عندك مجال
و البلا : إن صرت معدوم الضمير

و العجب : لا صرت تسأل منهو قال
و التعب : إن كنت تِبْحَثْ عن مصير

الغنى : بالنفس .. ما هو راس مال
و الفقر : من كان .. بـ أعماله فقير


يكفي يكفي .. أسئله إنهي الجدال
ويـ الله علمني عَن .. السِّر الخطير
ما أبي تضرب لي في غيرك مثال
قول : عنِّك وإعتبر سِرِّك في بير

جات طعنـه مِن جنوبك والشمال
يعني وضعِك بين مِن حُولك خطير

صاحبـي وإن ضاقت بعينك ليال
لك فرشت القلب مفروش الحرير

في [ بلاد الحلم ].. ممنوع العقال
والمصيبه الشعب ما إختار الأمير

وما ألومك .. كان شدِّيت الرحال
دام بيتك جرح / وفراشك حصير

هذا تعريفي .. إلى كلمة : مُحَال
شيء ودِّك فيه ولا يمكن يصير ..!

للشاعر / أحمد الصانع

احتراماتي

رائعه جدا يابنت الحجاز كعادتك

واختيارك من روعتك

أبدعتي يا بنت الحجاز في اختيار الموضوع .

الله الله
واااااااو وش هالموضوع الرائع يابنوته
والله رااائع وقريته عشرين مره ولا مليت منه
رائعه رائعه انتي بنوته واختيارك لهذا الموضوع قمة في الروعه والذوق
تسلم الاياااااادي