>
> كان فيه واحد " على نياته "..
>
> جرّب يستثمر أمواله !
>
> وكان عنده ببغاء يتكلم ..
>
> مشكلة الببغاء .. إنه كل ما شاف راعيه قال: ياغبي .. يا غبي .. يا غبي! ..
>
> راعيه ضاق صدره.. وقرر ياخذ الببغاء لمدرب الطيور علشان يعدّله ..
>
> يا مدرب الطيور .....
> شوف لك صرفة مع هذا الببغاء ....
> كل ما شافني فشلني عند الناس " غبي، غبي " !
> أبيك تدربه زين وتعدّل كلامه ..
> علشان يغيّر هالكلمات الي يرددها كل ما شافني !
>
> قال المدرب : ما عليك .. خلّه عندي كم يوم ..
>
> ولما راح راعيه .. جاب المدرب " سطل " مويه حاااارة ....
> وحطه قدامه .. وسأل الببغاء ..
>
> أنا مين ؟ !
>
> قال الببغاء : أنت صديق الغبي ! ..
>
> وينزله المدرب في المويه الحاااره ثم يطلّعه .. ويسأله ..
>
> أنا مين ؟
>
> قال : أنت صديق الغبي ..
>
> وينزله في الموية مرة ثانية .. ثم يطلعه ...
>
> أنا مين ؟
>
> وعلى هالحال .. حتى تربى الببغاء وتسنّع ..
>
> أخيراً .... قال له المدرب ..
>
> أنا مين ؟ !
>
> قال الببغاء : أنت صديق أذكى واحد في العالم ..
>
> ويوم جا راعي الببغاء .. قال المدرب: تفضل اسأله ..
>
> قال راعي الببغاء .. : أنا مين ؟!
>
> قال الببغاء : أنت مين ؟! وهذا سؤال !! ... أنت الذكي ....
> إلا أنت أذكى واحد عرفته في حياتي !
>
> قال له راعيه : .. طيّب ..
> وإذا لعبت بفلوسي على كيفي ؟!
>
> قال الببغاء : .. هذي فلوسك .. من عرق جبينك ..
> تسوي فيها اللي تبي ..
>
> قال : طيّب .. إذا دخّلت فلوسي عند " هابتكو " ؟ !
>
> قال الببغاء : ممتاز .. حركة استثمارية في غاية الذكاء .....
> ومن أذكى واحد في العالم ..
>
> طيّب .. وإذا دخلت فلوسي عند " الجمعة " ؟ ..
>
> طبيعي .. تنويع استثماري .. من أذكى واحد في العالم !
>
> طيّب .. وإذا دخلت فلوسي عند " ابن حسن " ؟ ..
>
> ذكاء خارق ... وماشي مع الحكمة اللي تقول " لا تحط البيض في سلة واحدة " ..
>
> فعلا أذكى واحد في العالم !
>
> طيّب .. وإذا دخلت فلوسي عند " العيد " ؟ ..
>
> عادي .. وزي ما يقولون " حشر مع الناس عيد " ....
> صحيح إنك أذكى واحد في العالم ..
>
> .... طيّب .. وإذا دخلت فلوسي في سوق الاسهم السعوديه؟ !
>
> قال الببغاء : يا عمي هاااات الموية ! .....
> قايلّك هذا أغبى وأثور وأدبش واحد في العالم !! 
تحياتي البايع
21-01-2008, 05:44 PM
نكته تناسب وضع السوق... 
المواضيع المتشابهه 
العرض العادي
