بورصة الاسهم السعودية

بورصة الاسهم السعودية (http://www.sahmy.com/)
-   الأسهـــم السعـــوديــــه (http://www.sahmy.com/f5.html)
-   -   السهران يدخل ويريح أعصابه (http://www.sahmy.com/t22134.html)

فايز 11-08-2005 03:30 AM

السهران يدخل ويريح أعصابه
 
[align=center]السلام عليكم ....

هذي يا الربع سالفه واحد من الزملاء .. وهو صراحة اخ عزيز علي جداً ..

اقولكم سالفته .. لان فيها عبره .. خصوصاً للمساهمين الجدد ..

انا راح اسميه .. النكبه ... لانه صراحة نكبه من جد ..

تبدا القصه يوم قرر النكبه انه يساهم .. اشترك مع سامبا .. وعمل له محفظه ..

وكانت اموره تمام التمام ... المهم الاخ سألني وش يشتري ...

صراحه نصحته بالقصيم الزراعيه .. لان راس ماله مهو بالحيل .. والقصيم كان سعرها مناسب .. 138

المهم الاخ توكل على الله وشرى فيها بكامل السيوله ...

عشر دقايق من بعد ما شرى الا والسهم مدحدر 135 ..

كلمني على طول .. يا ابو الشباب القصيم نزلت .. قلت له لا تخاف بترجع وبتعين خير ..

اليوم الثاني

النكبه : انا بعت براس المال ..

=: ليش الله يهديك .. شوف السهم الحين طاق الاربعين ..

النكبه : انا اول ما بعته وهو طاير ..

= الله يعوض عليك .. وهذا درس عشان تعرف الصبر ..

بعد يومين..

النكبه : اقول انت وش عندك من اسهم ..

= : عندي طيبه .. اللجين .. التعمير .. وغيرها

النكبه : انا قررت اشتري في اللجين ..

= انا شاريها من كم يوم 292 .. والحين تقدر تشتريها 289 ..

النكبه : شوف لي مباشر كم هي الحين ..

= حط طلبك على 289 وان شاء الله يعطيك ..

النكبه .. ابشرك عطاني .. كم وصلت الحين ..

= معليش يا النكبه .. الحين 286 .. وان شاء الله بتعدل

بعد اسبوع ..

النكبه : اقول اللجين ذي دبلت كبدي ..

= يا ابن الحلال اصبر شوي وبتعين خير ..

النكبه : اقول شف وش اخبارها في مباشر ..

= الحين حول سعرك لكن يمكن تروح فوق ..

النكبه : لحظه .. انا بعرظها للبيع الحين .. بحط 298 .. ان جابته والا عساها ما تجيبه

= الله يبارك لك .. هاه حطيت الطلب ..

النكبه : ابشرك ابشرك .. باعولي باعولي ..

= عسى ما شر .. تو الناس .. السعر ما وصل 290 ..

النكبه .. اقولك تم التنفيذ .. انت منت مصدق

= يا اخي كل شي جايز .. بس مباشر قدامي .. واعلى سعر 291 .. اقول شيك في حسابك والعمليات المنفذه وشف وش السالفه

النكبه : لاحول ولا قوة الا بالله .. هذي والله المشكله

= عسى ماشر ..

النكبه : يا خي بدال ما اكتب 298 كتبت 289 .. كم سعرها الحين ..

= الله يعوض عليك ... سعرها الحين 299 ورايحه لل 300 ..

النكبه : والله اني داري .. حظ معفن ..

( النكبة اشترك مع شلة التوصيات عبر الجوال)

النكبه : انا قررت اشتري فيبكو .. شف لي كم سعرها في مباشر ..

= الله يوفقك .. سعرها الحين 306 حط 304 ان شاء الله يعطونك ..

النكبه : انا مبغى التوصيه تروح علي .. حطيت 306 .. يقولون انها بكره 340 .. شوف كم وصلت الحين

= معليش يا النكبه .. الحين السعر 299 .. لكن معليك ان شاء الله بتعوض ..

النكبه : هذي المره ما انا بايع الا بربح .. هذي توصيه ذهبيه ..

بعد اسبوع ..

النكبه : بالله عليك شوف وش صار مع هالشركه .. علتني الله يعلها ..

= والله السعر نازل بالحيل .. 289 الصبر زين وانا اخوك ..

بعد يوم ..

= مبروك يا النكبه ارتفعت فيبكو .. الحين فوق العشره ..

النكبه : يا ابن الحلال انا بعت من امس بخساره .. عشان كذا طار السهم ..

= الله يهديك بس .. تعيش وتعوض ..

بعد كم يوم ..

النكبه : ابشرك شريت في سيسكوا بـ 204 وفيه عنها اخبار ممتازه ..

= مبروك .. وانا الحين با اشتري 200 سهم .. خلنا نصير مع بعض .. بكم شريتها ..

النكبه : 204 ما تسمع ..

= لا بس الحين شريتها انا ب 198 ..

النكبه : الله يعين .. بنصبر اسبوع وبعدين يصير خير ..

بعد اسبوع ..

النكبة : اقول يا ابو الشباب انا ببيع .. حشا هذي ماهي شركه .. كل يوم نزول .. واذا طلعت يالله ريال والا ريالين ..

= يا ابن الحلال توها مرتفعه اصبر شوي ..

النكبه : اقول شفها بكم الحين ..

= اليوم ماشاء الله طالعه .. 195 ..

النكبه : هي كل يوم كذا 195 ثمن تدحدر .. انا ببيع ..

بعد 10 دقائق ..

= يا النكبه عسى ما بعت ..

النكبه : لا تقولي انها ارتفعت .. تراي بعت وسكرت الكمبيوتر من الطفش .. من يوم خشيت ذا الاسهم واتا في خساره ..
من يوم ادخل السهم وهو مدحدر .. ومن ساعة ما اطلع منه .. يقلع ..

= والله يا النكبه انها الحين فوق الـ 200 انت ما تصبر الله يهديك ..

بعدها بكم يوم ..

النكبه: انا قررت استثمر .. وبحط فلوسي كلها في بنك البلاد .. هاه وش رايك ..

= صراحة تفكير سليم .. وان شاء الله بتبيع فوق الـ 900 ..

النكبه : يا خي زهقت من الاسهم الصغيره .. من ادخلها الا وهي منقلبه على بطنها .. ومن يوم اطلع الا وهي في السما ..
هذا بنك البلاد .. عليه كلام كبير .. ومن يوم بدا وهو فوق ..

= الله يوفقك .. وتراه اليوم نازل .. يعني تقدر تصيده بـ 776 .. فرصه .. لانه توه راجع من 800

النكبه : الحين بحط الطلب على 777 وخله عندي .. ما ابيعه لين يعوضني عن كل خسايري ..

= الله يوفقك ...

بعدها بكم يوم ..

النكبه : شفت الي صار .. قايلك حظي رايح فيها .. الحين بنك كبير .. ينزل من 777 الي 715 ..

= يا ابن الحلال السوق كله نازل وان شاء الله بتعوض فلوسك .. بس اهم شي الصبر ..

النكبه : والله ما ابيعه لين يجيب لي كل فلوسي ..

=== === ==

هذي قصة النكبه باختصار .. والا فيه اسهم كثيره دخل فيها .. وسبحان الله من يوم يدخل السهم وهو مدحدر من جد ..
وفي اللحظه الي يطلع فيها من السهم يقلع السهم اقلاع ..

طبعاً الواحد يقول هذا شي مقدره الله .. وعلينا بالصبر ..

والله يا اخوان ان القصه حقيقيه .. وحبيت اقولها لكم من باب الترويح عن النفس .. ومن باب العبره ..

ودام الجميع بخير ..

منقوووووول

المليحي ..[/align]

بائع الورد 11-08-2005 03:40 AM

يقول والله اعلم أن بعض الناس ماله رزق في الاسهم بس تلقاه عنده مصدر الله كتب رزقه

المزيووون 11-08-2005 03:46 AM

[b]الله يعوضه يارب
والاهم يااخوان الصبر مفتاح الفرج
[/b]

بورصية 11-08-2005 07:51 AM

الله يعفيك قله يدخل في الغذائية ويبيعها بعد يومين .. ههههههههههههههههه تراني محتاجه دراهم هاليومين

قصة من جد فيها عبرة ........... سوق الاسهم يعلمك الصبر وان ماتعلمت فانت اكيد خسراااااااااااان

ميــــــدان 11-08-2005 08:14 AM

والله كثير من الناس شايفه حظها و حظ النكبه اخوان في هالاسهم

الحوووووت 11-08-2005 08:44 AM

انت السبب في خسارته اقسم الاسهم اللى عندك بينك وبينه وعوضه عن الخساره


الساعة الآن 12:07 AM.

Powered by vBulletin® Version 3.8.5
Copyright ©2000 - 2020, Jelsoft Enterprises Ltd.
Search Engine Friendly URLs by vBSEO 3.3.0 ©2009, Crawlability, Inc.